النكـد و سنينـه

النكـد و سنينـه
    من كام يوم جاني كابوس يامغيث ولا في أفلام هتشكوك .. قال إيه أنا كنت في حته مقطوعه مافيهاش صريخ ابن يومين.. بعدين لقيت نور جاي من بعيد.. قمت مشيت لحد ماوصلت ليه.. لقيت قصر كبير ولا قصور ألف ليله وليله .. دخلت هناك لقيت في واحد قاعد على كرسي العرش و لابس تاج من الريش وكأنه طاووس و حواليه جواري و غلمان كتير و لا هارون الرشيد..!!


    لما شافني سألني بالفصحي: من أنتم..؟!


    رديت عليه قولتلو : هو أنت منهم..!!


    فأجابني بفخر وبمنتهي الألاطه: أنا حفيد حفيد حفيد سيبويه..


    قلتله: تشرفنا يا مولانا وحضرتك قاعد بتعمل إيه هنا لوحدك في الحته المقطوعه دي..؟!


    قالي بعنتظه: أنا بقرد الشعر و بنقض القصة .. و بنكد على إللي جابو إللي يقع تحت إيدي..!!


    قلتله :ومين دول إللي حواليك..؟!


    قالي: دول اتباعي ومريدي .. المحظيات والمحظيين من الفتيات والفتيان الحلوين..!!


    بصيت حواليا وسألته: ومين دول اللي هناك في القفص ملط هناك.. و قاعدين بيتعذبوا بالكرابيج ..و بيتقطعو بالسيوف ..و بيتشرّحو بالسكاكين ..و بتتكسر أيديهم بالشواكيش ..و بتتقصف رقابيهم بالمقصله..!!


    قهقه بصوته الجهوري: ..دول شوية عيال عاملين فيها كتاب و شعراء ..تطاولو عليا .. و عاوزين يعملو راسهم براسي.. فحبيت أكثر عظامهم و أطرم سنان أقلامهم .. عشان يتوبو عن الكتابة ..و يعرفو إني الأحق بالزعامة.. و الولايه على كرسي الأدب.. فلا يعلو صوت على صوتي..!!


    قلتله وكلي خوف : ياحفيظ .. يامغيث.. يا لطيف..


    فابتسم في خيلاء وغمز لي بعينه اليمين : هيه.. هتختار تكون من المحظيين..؟


    ثم جحظت عيناه وأشار لي بعصاه : ولا من العصاه....؟!


    قلتله: يا مولاي أنا مجرد صعلوق من الهواه.. بكتب إللي على مزاجي وكل إللي بهواه.. و مبعرفش اشتغل شغل الحواه .. مبتفرقش معايا جوايز .. ولا بسعي لمناصب.. ولا بحني الجباه.. إلا لله..!!


    نظر لي شذرا وقال و الشرر يتطاير من عينيه و الرزاز من فمه: إذاً عليك الويل و الثبور .. و عظائم الأمور..!!


    قلتله مستعطفا: يا مولاي خليك صبور.. و بلاش غرور.. ممكن أسألك سؤال لا مؤخذه صغيور..؟!


    ضحك بصوت مجلل و قال: إنت يا صعلوك عاوز تسأل الملوك..؟!


    أجبته بهدوء: يوضع سره في أضعف خلقه..!!


    نظر لمن حوله في خيلاء فبادلوه الهمهمات وسجدوا على الأرض يبوسوا رجليه فقال:وريني كده عاوز تسأل في إيه..؟!


    سألته بإستهزاء: إيه الفرق بين النقد والإنتقاد ..؟!


    قهقه بصوت عالي فرفع اتباعه رؤسهم و بدؤو في الضحكات ثم قال: ودا سؤال..النقض.. من الرفض.. و الطعن في كل حاجه ..زي محكمة النقض كده.. تطلع كل حاجه غلط .. ومش مستوفيه.. و تهد كل حاجه و تحولها إلي أنقاض....مش ده النقض برضوا يا متعلم يابتاع المدارس..!!


    أومأ الجالسين حوله بالإيجاب وصفقوا كمزيد من الاستحسان فأردف قائلا: أما الانتقاض.. ياض يعني إنك تنقضّ على إللي قدامك تجيب وشه في الأرض وتقعد عليه تكتم نفسه لحد ماتجيب خبره.. و تكسر مبتدؤه..!!


    فقاطعته متعجبا : يامولانا ..مش بالضاد .. لأ بالدال..!!


    فتدارك غاضبا: متقول كده من الأول جتكم البلاوي مبتعرفوش حتى في الإملاء.. في حد مايعرفش النقد.. النقد جايه من النقود.. يعني الفلوس ..اللارجا بالفرنساوي..أنت عمرك ماسمعت عن صندوق النقد الدولي..؟!


    فابتسمت قائلا: الله ينور عليك يامعلم..إنت أوصطه في الهدد.. يخرب بيت إللي يزعلك.. هيتطرد من البلد.. أصل حبايبك ملعهمش عدد..!!


    وبعدين إديته ضهري ومشيت وأنا بقول : الله يخرب بيوتكم .. جتكم البلاوي.. مليتو البلد..!!

    إرسال تعليق